مدير توكسيك ولا هجوم زومبي؟
هل بيئة العمل التوكسيك مخيفة أكتر من هجوم زومبي؟ أعتقد فعلا. يعني تابعت حاجتين مختلفتين الأسبوع عن بيئة عمل توكسيك. بدأت قراءة قصة عن شخص مش بيعمل حاجة في حياته غير أنه بيشتغل وحسيت بقدر البؤس والمعاناة في روتين حياته، وشفت فيلم هتكلم عنه أكتر في قسم المشاهدات، عن شخص بيتبسط لما بيحصل هجوم الزومبي لأن ده معناه أنه مش مضطر يروح الشغل، وفكرت في أن ثقافة الشغل بتاعتنا توكسيك واستغلالية فعلا ومضطرين نقبلها عشان محتاجين الشغل، ووجود بيئة عمل مش توكسيك وبتديك اللي أنت محتاجه منها شيء نادر الوجود فعلا.
يعني أنا دلوقتي مش عارفة أقيّم إذا كانت بيئة العمل اللي أنا فيها توكسيك ولا لأ، بس مش هنكر أنها استغلالية. وكم الناس اللي أعرفهم اللي بيعانوا في الشغل ومش بيشتكوا خوفا من الطرد أو الاستقصاد أو أي تبعات تانية لشكواهم بتخلي الجيل بتاعي يصعب عليّ فعلا. إحنا مساكين فعلا.
قراءات الأسبوع:
بمناسبة المقالة اللي نشرتها صحيفة أجنبية اعتمدت فيها على الذكاء الاصطناعي وكانت النتيجة ترشيح كتب وهمية وغير موجودة، دي قائمة ترشيحات لكتب حقيقية موجودة لو كانت الأفكار اللي في القائمة المزيفة عجبتكم: من هنا
قصة رعب عن متجر أثاث يشبه آيكيا وإحدى قطع الأثاث منه مسكونة؟ من هنا
قصة رعب على خيال عن شخص بيستدعي عفريت عشان يساعده على عقاب الأشخاص اللي بيزعجوه بس الموضوع بيخرج عن سيطرته. من هنا
كتب الأسبوع:
Mort Cinder - Alberto Breccia:
من أغرب الروايات المصورة اللي قريتها. بتبدأ بداية قوية جدا، وأعتقد أن دخلتها هي الجزء المفضل عندي فيها. اتنشرت في شكل حلقات مسلسلة وتعد واحدة من أشهر الكوميكس في الأرجنتين. بتبدأ بأننا بنقابل راجل كبير يمتلك متجر للتحف والآثار وبتقوده مجموعة من المصادفات الغريبة إلى قبر شخص يدعى “مورت سيندر”، وفجأة بيرجع مورت سيندر ده للحياة، وبيبقى جزء لا يتجزأ من حياة بطل القصة وبيدخل معاه في صراع غريب ومش مفهوم ضد أشخاص غريبين متآمرين هدفهم تدمير مورت سيندر. وفي بقية الرواية بنشوف مغامرة مختلفة لمورت سيندر في عصر مختلف ورا التاني بيورينا أنه شخصية خالدة، وممكن كان كل شوية يموت ويُبعث تاني. حسيتها تجربة مختلفة تماما في عالم الكوميكس.
A Vampire in the Bathhouse - Niko Izuki:
مانجا كيوت جدا جدا ورسومها لطيفة قوي وانتهت بعدد واحد وقرأتها على نيتغالي، رغم أن فيه مجال في القصة أنها تبقى أكتر. بنشوف شاب وأخوه الصغير وجده وعندهم أونسن ياباني، اللي هو حمام عمومي للاسترخاء والاستمتاع بالمياه الساخنة والاستجمام، وفي أحد الأيام بيقرر مصاص دماء ترك عالمه والمجيء إلى عالم البشر والعيش في الأونسن بتاعهم لأنه قرر أن ده شيء هيريحه ويساعده على الاسترخاء، وبنشوف العلاقة اللي بتتشكل بينه وبين كل أهل القرية الصغيرة اللي بيروحها وهو بيحاول يفهم عادات البشر. حبيت الكوميديا بتاعتها جدا.
The Fire never Goes Out - N.D. Stevenson:
بالنسبة لي، ما زال أجمل حاجة قريتها من ستيفنسون هي الرواية المصورة نيمونا، وكمان تجسيد شخصيات “كاري أون” لـ رينبو راول. لكن دي مذكرات شخصية في فترة معينة من حياتها، لما كانت لسة في الجامعة وبتشق طريقها كرسامة وفنانة ووسط ما جاتلها فرص تحقق حاجات كبيرة وكل المصاعب اللي واجهتها في الفترة دي من حياتها. هي مش منمقة أوي وحاسة الكتاب ده أقرب ما يكون لشخابيط زي اللي بنكتبها واحنا بنخرج كل اللي جوانا في جلسة ما، يعني كنت أحب يتعمله إيديت ما قبل النشر. بس ممكن ميزة ده أنها قدمت كتاب صريح جدا.
Cinema Panopticum - Thomas Ott:
أعتقد أني اكتشفت رسام ومؤلف روايات مصورة مفضل جديد. يعني تخيلوا كتب شون تان بس بلمسة سوداوية وكئيبة ومخيفة. دي رواية مصورة من غير أي كلمات، وبتعتمد على الرسوم بالأبيض والأسود فقط. وبنشوف فيها بنت بتدخل مهرجان، ومفيش لعبة من الألعاب اللي بتشوفها تكفي الفلوس اللي معاها، غير خيمة غريبة بتدخلها وفيها كذا جهاز، وكل واحد منهم معمول عشان يعرض قصة معينة، وفي كل فصل بنشوف القصة اللي البنت بتتفرج عليها، وكلها بصراحة مرعبة بس الرسم بتاعها فظيع. أنصح بها للي بيحبوا الرعب والرسوم الدقيقة والمفصلة.
Jojo’s Bizarre Adventure, Part 6: Stone Ocean - Hirohiko Araki:
بدأت الجزء السادس من سلسلة “جوجو”، وقرأت منه حتى الآن 3 أعداد، وأقدر أقول إنه أفضل حتى الآن من الجزء السابق بكتير. أولا، البطلة المرة دي بنت، وبنت مختلفة عن كل البنات اللي ظهروا في سلسلة جوجو، وأنا مستمتعة بأحداث المانجا اللي كلها حتى الآن بتدور في السجن، أول مرة نشوف الأحداث مقيدة بمكان واحد كل المدة دي، بس المؤلف شاطر ومش حاسة بأي زهق من الأحداث اللي مش بتخرج برة السجن.
Cats of the Louvre - Taiyo Matsumoto:
من ألطف أعمال المانجا اللي قريتها في حياتي. بنشوف 3 أشخاص مختلفين بيشتغلوا في متحف اللوفر: حارس قديم وحارس جديد ومرشدة. ووسط ده كله بنكتشف الغرفة العلوية السرية اللي بيعتني فيها الحارس الكبير بالقطط، والقطط دي بتتجول زي ما هي عايزة في المتحف بعد خروج الناس. لكن فيه قط منهم بالذات بينجذب لعالم اللوحات اللي يبدو أنه ساحر بشكل غير مألوف، لدرجة أن حد ممكن يتحبس جواها. مغامرة حلوة والحاجة الوحيدة اللي معجبتنيش كانت اللحظات اللي بنشوف فيها القطط بتاخد شكل بشري، رسمهم وشكلهم وحركتهم وهم مرسومين قطط أحلى بكتير.
Espada: The Will of the Blade - Anabel Colazo:
رواية مصورة قرأتها من على نيتغالي. أسلوب الرسم والألوان بتاعها جميل جدا بس حسيت القصة مخدتش مساحة كافية عشان نشوف الأحداث وهي بتتطور فيها. بتدور القصة في عالم خيالي، بتحكمه ملكة ولها أولاد كثر، لكن بنتابع بالذات أميرة وهي ولية العهد اللي ستحكم المملكة وترث السحر من الملكة. والمملكة دي ليها أسطورتها الخاصة عن وحش قديم واجهوه وبطل جاء بسيفه السحري وحاول مواجهة الوحش واختلاف الأقاويل والتأويلات للقصة دي. وسط ده كله بنشوف الأميرة وهي غير مقتنعة بسياسة الملكة وبتسعى لإيجاد البطل عشان تخليه يخلي السحر متاح للجميع مش حكر على الملكة.
The Thorns - Dawn Kurtagich:
رواية قرأتها على نيتغالي، وبصراحة معجبتنيش. هي رواية إثارة على غموض وبنتابع فيها الأحداث في خطين زمنين. بنشوف الحاضر وبطلتنا فيه مؤلفة ناجحة بتكتب روايات غموض وجريمة ويبدو أنها متأثرة بمايضها، وبنرجع نشوف ماضيها وبالذات الفترة اللي قضتها في مدرسة داخلية إفريقية وعلاقتها السامة المريبة بزميلتها في المدرسة اللي بتسمح ليها بطلتنا بأنها تتحكم فيها بالكامل. بنشوف مظاهر الهوس والغيرة والنرجسية والاعتمادية في علاقات مجموعة من البنات في سن المراهقة وازاي الفترة القصيرة اللي بيقضوها في المدرسة دي بتفضل مؤثرة عليها طول حياتها البالغة. حسيت أنها ممكن كفكرة كانت شيقة، بس التنفيذ مكانش أحسن حاجة.
Cemetries and Galaxies - John Koethe:
ديوان شعري قرأته من على نيتغالي، والمؤلف أستاذ جامعي في الفلسفة وده كان باين فعلا في القصائد النثرية دي. يعني حبيت أغلب الأفكار ولقيتني برتبط بقصائد كتيرة، وده اللي بكون عايزاه في الشعر، بس ساعات كنت بتوه منه وفجأة بكون مش فاهمة الجملةل وأضطر أعيد الجزء تاني، فهو مش للناس المبتدئة في التعمق الفلسفي والخواطر التأملية بالإنجليزي، بس أقدر أقول إنه كان مختلف.
كرمل وأساور الاحتلال - زينب خليل جلفي:
رواية صعبة التقييم، لأن لو قارنتها بروايات تانية، حتى روايات مكتوبة عن معاناة الفلسطينيين تحت الاحتلال، فهي مش هتكون زيهم خالص، لأن الأسلوب عادي جدا، بس من ناحية تانية حسيت أنه كتاب مهم كتدوين وتوثيق لحكايات الأسيرات في سجون الاحتلال. استغربت أن الكاتبة قررت تعملها في شكل رواية بدل ما تعمله كتاب غير روائي يركز على النقطة دي. أفتكر في الكتاب غير الروائي، أسلوبها كان ممكن يخدم الحكايات أكتر، لكن كرواية، كانت مخيبة للآمال جدا.
بدأت قراءة:
Acme Novelty Library Comics:
لسبب ما، بسبب اسم “أكمي”، كنت متخيلة أن الكوميكس دي هيكون أبطالها شخصيات لوني تون، بس كنت غلطانة تماما. هتكلم عنها أكتر لما أخلصها، بس هي كوميكس جنونية ومش مفهومة تماما بس ممتعة.
The Scandal of the Century:
كتاب تجميع لعدد كبير من مقالات وكتابات جابرييل جارسيا ماركيز الصحفية. ومستمتعة به أشد استمتاع!
Lady Impatience:
رواية رومانسية تاريخية. هي الكتاب الثالث من سلسلة، وكل كتاب في السلسلة بيركز على أخت من الأخوات السبعة في رحلتهن لإيجاد الحب. الكتاب التالت ده لقيته على نيتغالي وبدأته وبعدين اكتشفت أنه الكتاب التالت من السلسلة بس مستمتعة به ومتأثرتش جدا بعدم قراءة أول كتابين.
أعترف بأنني قد عشت:
مذكرات بابلو نيرودا لقيتها على أبجد وقلت أجربها، وحاسة باستفزاز شديد من المترجم. لسبب ما، في فئة من المترجمين فاكرين كل ما اختاروا كلمات ومصطلحات وألفاظ متحذلقة وصعبة الفهم كانت ترجمتهم أفضل. الكتاب ده فعلا بيفكرني بجملة: أحسن كتاب مترجم هو اللي متحسش أنه مترجم. يلا، هديله فرصة ونشوف.
مشاهدات الأسبوع:
Great Pretender:
بدأت الأنمي ده وخلصته، ورغم أنه مش هيكون أنمي مفضل إلى الأبد، لكنه علق معايا وحبيته، وبحب حركة الخدعة الطويلة، لما بنكتشف أن كل حاجة كان متخطط ليها من الأول. بنتابع البطل ماكوتو، ولد ياباني قادته الظروف أنه يبقى نصاب ويبقى مصدر دخله هو النصب على الناس وبيقع في إيد مجموعة من النصابين اللي بيشتغلوا على صعيد عالمي وأكبر بكتير من النصب اللي بيعمله. بنشوف ازاي كل الشخصيات دي مرتبطة ببعض وازاي اتأثروا ببعض.
Mischievous Kiss: Love in Tokyo, Season 1:
إعادة مشاهدة للدراما. دي دراما يابانية مستوحاة من مانجا “إتازورا نا كيس”، وبتركز على بنت اسمها كوتوكو، بتحب ولد اسمه ناووكي إيري، وبتكتبله رسالة حب وهو بيرفضها. وتشاء الظروف أن بعد رفضه ليها، بيعيشوا في بيت واحد لأن باباها صديق عيلتهم، وبنشوف المفارقات مع كوتوكو اللي مش قادرة تتخطى حبها ليها رغم رفضه ليها. طبعا أكبر مفارقة هنا هي أنه عبقري وهي ذكاءها عادي، هو متفوق في كل حاجة بيعملها وهي بتبذل كل جهدها وبتطلع الحاجات عادية منها. بصراحة ده مثال للعلاقة التوكسيك: المسلسل ده بكل نسخه والأنيمي والمانجا، بس مش هنكر أني بحب أتفرج عليهم، والكوميديا اليابانية مميزة فعلا، والموسيقى التصويرية بتاعت المسلسل بقت محفورة في دماغي. متشوقة أبدأ الجزء التاني.
Zom 100: Bucket List of the Dead:
فيلم ياباني مستوحى من مانجا وأنيمي بنفس الاسم. بنشوف شاب مطحون في الشغل وفجأة بيحصل هجوم للزومبي في اليابان بيدمر الدنيا، لكن ده بيفرحه لأنه بيلاقي أنه مش مضطر يروح الشغل وبتدب فيه الحياة من جديد لدرجة أنه بيعمل قائمة أمنيات حاجات نفسه يحققها قبل ما الزومبي ياكلوه. اكتشفت بعد ما شفت “شون أوف ذا ديد”، أن أفلام الزومبي اللي بحبها بتكون أفلام الزومبي الكوميدية، وده يقع تحت ذلك التصنيف. مختارين أغاني حلوة للفيلم. الفيلم مليان كليشيهات بس مش هنكر أنه كان ممتع.
Turtles all the Way Down:
فيلم مقتبس من رواية بنفس الاسم لجون غرين. الفيلم بيركز على المراهقة “إيزا”، اللي بتعاني من الوسواس القهري وبنشوف شكل جديد لتجسيده في الفيلم ده. كنت مهتمة أشوف هيعملوها ازاي في الفيلم، بعد ما كنت قرأت الرواية. ومش عارفة ليه؟ بس حاسة أن فيه اختلافات بين الرواية والفيلم مش عارفة أحددها، أو مش متأكدة إن كان ده لأن عدى وقت طويل من ساعة ما قرأت الرواية. المهم في وسط ده كله بنشوف قصة حب بتواجه صعوبة في المضي فيها بسبب مرضها، وقضية اختفاء شخص ما، ووسط ده كله بتحول “إيزا” أنها تعيش حياتها.
بدأت مشاهدة:
Ouran High School Host Club:
ممكن دي تكون المشاهدة الرابعة للأنيمي ده ويظل من أفضل الأنيمهات اللي شفتها وزعلانة عليه فعلا لأنه مكملش. يعني لما شفته أول مرة ورحت بعضها قرأت المانجا كاملة، زعلت أن فيه حاجات كتير في المانجا مشفتهاش من الأنيمي. الموسيقى بتاعته رائعة والكوميديا مظبوطة والتمثيل الصوتي رائع والرسم جميل وواخد جو المانجا مظبوط، يعني كل حاجة فيه حلوة، وبالذات الرومانسية طبعا اللي مش بنشوفها بتكمل للأسف لأنهم مكملوش الأنيمي! مش عارفة هيكون شعوري ايه دلوقتي لو قرروا يعملوا ريبوت جديد ليه من غير أغنية البداية اللي حفظتها!
KISS KISS FALL IN LOVE! <3
فيديوهات ولينكات الأسبوع:
من الفيديوهات المتكررة اللي بحبها على القناة دي هي سلسلتهم من الإعلانات الواقعية اللي بتوصف المسلسل أو الفيلم بجد، بس بصراحة مش بشوفها غير لما بكون اتفرجت على العمل، ولما لقيتهم عملوا إعلان عن فيلم مونتي بايثون الأشهر والأفضل في نظري، مقدرتش أقاوم أشوفه: من هنا
من ذكريات الثانوي هي مشاهدة كرتون كركر وعبقر على إم بي سي 3، ورغم أني لقيته بلغته الأصلية، لكن الدبلجة كان دمها ظريف جدا، وسعيدة أني لقيت الحلقات على اليوتيوب وكانت جرعة نوستالجيا ممتعة: من هنا
“The light is fading from the day. The rest is darkness and dismay.” ―
Edward Gorey, The Iron Tonic
حلقات البودكاست المفضلة:
(Welcome to the Night Vale):
A Story About Me
للاستماع من هنا
أشياء ألهمتني/أسعدتني هذا الأسبوع:
سطحية لدرجة اني دخلت عشان صورة هيو لوري