أيقظوني عندما تتحسن الأوضاع

Apr 14, 2025

مواصلة الكتابة في النشرة دي تحدي بيني ونفسي، ورغم انشغالي، عايزة أرجع أكتب كل أسبوع تاني. بمر بتحولات جديدة في الحياة: فيه تغييرات جديدة في الشغل أثرت على وقت فراغي القليل بالفعل وبحاول أنقي وأختار بين كل هواياتي وأنشطتي عشان أشوف هتخلى عن ايه وهحافظ على ايه. السنة دي ممكن تكون من أبطأ السنين في القراءة وإنجاز خطط الكتب، بس على الأقل مبطلتش أقرأ، لأني حاسة أنه لو سبت نفسي أسبوع مثلا من غير قراءة مش عارفة هقدر أرجع تاني ولا لأ.

ناس كتير بيشتكوا من الروتين بس أنا بحب الروتين لما يكون كله أنشطة بحبها، يعني مفيش في نظري أحلى من روتين يتضمن كل أنشطتي المفضلة كل يوم. طبعا الروتين اللي كله شغل ومفيش فيه مساحة لأخذ بريك ده أسوأ أنواع الروتين بس مش هنتكلم عنه، لأن دي مساحة للكلام عن الحاجات اللي استمتعت بيها.

أعلنت شركة نانيتندو عن جهاز سويتش الجديد اللي هينزل السنة وده فكرني أني بقالي حبة ملعبتش على السويتش القديم بتاعنا، فقررت أرجعله تاني وبختار دلوقتي من الألعاب اللي عندنا ليه وخدت بالي أننا مجبناش أي لعبة بسعرها الكامل عليه تقريبا، كلها جبناها وقت التخفيضات، فلما هينزل جهاز جديد بأسعار 2025 الجديدة هتكون صدمة حقيقية في أسعار الألعاب.

قراءات الأسبوع:

فريد عمارة واحد من الفنانين اللي بيستخدموا تصميم الجرافيك في تقديم أعمال نثرية جميلة، ونزل أول عدد من مجلته بالنشر الذاتي، (أسود سادة)، قرأت العدد في قعدة واحدة وحسيت أني عايزة كمان. كان ممتع فعلا. هسيبلكم لينكين، تقدروا تحملوا العدد الأول منهم: من هنا أو من هنا
بعض المقالات من ساب ستاك اللي عجبتني:
- سرّ السعادة المنسيّ: كيف يُعيدُ الامتنانُ تشكيلَ حياتِكَ وصحّتكَ؟ من هنا
- LEAVING TOKYO IS LEAVING YOU: من هنا
- how to find interesting articles in a sea of clickbait: من هنا
قصة مخيفة خيالية عن بنت بتواجه شبيهة ليها وتأثيرها على حياتها: من هنا
قصة عن امرأة عايشة في عالم موازي وبتهرب من تأثير عالم آخر هربت منه: من هنا
كتب الأسبوع:

Fungirl: Tales of a Grown-Up Nothing by Elizabeth Pich:
الفنانة دي بحب ليها سلسلة من الكوميكس المضحكة اللي بتقدمها بالتعاون مع فنان تاني، بس الصراحة متوفقتش جدا في الكوميك المنفردة دي. بنتابع شخصية غريبة الأطوار شوية، ومعنديش مشكلة في القصص اللي بتتعامل مع شخصيات غريبة، بس مكانش فيه أحداث ولا تطور للشخصية ولا متعة ولا أي سوى أحداث متفرقة من حياتها مكنتش مثيرة بما يكفي سوى لمحاولة إقارة الجدل بس من غير محتوى مضحك أو قوي.

Gotham Academy comics:
السلسلة دي بدأت بداية قوية بس بقت مخيبة للآمال شوية. السلسلة بتبدأ بأننا نتابع مجموعة من المراهقين في أكاديمية دراسية في مدينة غوثام اللي بيحرسها وبيعيش فيها باتمان وكل الأشرار والشخصيات من عالمه، والأبطال بتوع الكومميك دي بيبدأو يتورطوا مع باتمان والأشرار الهاربين من مصحة أركام. القصة كانت ممكن تبقى حلوة، بس بعد العدد الأول، حسيت أن القصة فقدت اتجاهها وقلبت على أحداث دراسية عادية شوية من غير اهتمام كافي بالقصة اللي بدؤوا بيها. وده خلاني مش مهتمة أكمل بقيتها بعد أول 3 أعداد.

دورية الليل لـ ستيفن كينغ:
مجموعة قصصية كبيرة بدأتها من أول السنة وخلصتها وكانت الترجمة لـ محمد عبد النبي ومحمود راضي. وطبعا بما أنها مجموعة قصصية لستيفن كينغ، فأغلب القصص رعب واللي قرأ لكينغ قبل كده هيلاحظ بعض الأفكار المتكررة في أعماله. شوفوا مراجعتي على غودريدز، كتبت ريفيو قصير جدا لكل قصة من المجموعة: من هنا

The Ravenmaster by Christopher Skaife:
كتاب مذكرات لشخص بيمارس وظيفة مثيرة للاهتمام. مهمته الاعتناء بالغداف أو الغراب الأسحم اللي عايشين في برج لندن. وبما أن الكتاب مذكراته فبيتكلم عن مسيرته المهنية وحياته بالإضافة للكلام عن الغربان وحياتها، بالإضافة إلى بعض التفاصيل اللي عجبتني عن الأساطير والقصص المحيطة بهم. مشكلتي مع الكتاب كانت أسلوب كتابته وإسهابه في الكلام عن تاريخه ومسيرته العسكرية في الجيش، بس طبعا بما أنها مذكراته فده بديهي.

In Real Life by Core Doctorow and Jen Wang:
رواية مصورة لطيفة بأسلوب رسم جميل بتتابع فتاة بتدخل عالم الألعاب الأونلاين وبتلاقي لنفسها مجتمع عبر اللعب دي وكمان بتتاح ليها فرصة مساعدة شخص في بلد تانية وإحداث تغيير من نوع ما. في المجمل كانت خفيفة وممتعة وتعجب اللي بيحبوا عالم الفيديو جيمز.

Sunder, vol. 1:
عدد أول من سلسلة كوميك جديدة قرأتها من على نيتغالي، فمش عارفة هتكمل بكام عدد، بس كبداية كانت ممتعة. بتاخد الفكرة المعتادة لبطل بتجيله مغامرة ومهمة وبيكتشف حاجات عن نفسه مكانش عارفها. بنتابع شخص عايش حياة هادية وبسيطة في أرشفة الكتب في قرية هادية وبيحلم بأنه يخوض مغامرة وبيلاقي نفسه مجبر على المغامرة دي لما بيلاقي كتاب سحري بيخفي أسرار كتيرة. العالم نفسه كان ممتع وتنوع الشخصيات عجبني.

Aquicorn Cove by K O’neill:
قرأت كتير لكيه أونيل، وبحب رسومها وألوانها. دي رواية مصورة عن بنت بتواجه صعوبة في تقبل موت مامتها وبترجع للمدينة الصغيرة اللي كانوا عايشين فيها مع باباها وبتشيل مسؤولية حماية المحيط وتحذير الناس من تأثير التلوث على المحيط ومخلوقاته وعليهم كمان كبشر.

String, vol.1:
عدد أول من سلسلة كوميكس جديدة قرأتها على نيتغالي، عجبتني الألوان وتصميم الشخصيات. الكوميكس بتعتمد على فكرة منتشرة كتير في الأعمال الكورية أو اليابانية، عن خيط أحمر بيربط بين الشخصين اللي مكتوب لهم يبقوا مع بعض: خيط القدر الأحمر. بطلة الكوميكس دي بتشوف خيطين من نوعين مختلفين: خيط أزرق بين الأشخاص اللي كانوا في علاقة رومانسية وخيط أسود بيربط بين قاتل وضحيته، وبنشوف ازاي بتساعد الشرطة بموهبتها دي. عجبتني الفكرة وأحب أني أشوفها في مسلسل يوما ما.

Cut and Thirst by Margaret Atwood:
قصة قصيرة لمارغريت أتوود قرأتها من على نيتغالي، بس معجبتنيش أوي. بنشوف فيها مجموعة من السيدات الأكبر سنا وكلهن لهن علاقة بعالم الكتب والتأليف والنشر وبيجتمعن للتخطيط لعملية انتقام من مجموعة كتاب شباب امتثلوا لأمر كاتب كبير وسببوا حادث لصديقتهم الكاتبة وسببلها إعاقة. عجبتني اللي طرحته عن فكرة “ألتراس الكتاب” ومدى خطورتهم، بس القصة نفسها مكانتش ممتعة بقدر كبير.

توقفت عن قراءة
China Rich Girlfriend
وأظن أني مش هكمل السلسلة دي. حاسة أن أول كتاب كان كافي جدا ليا مع الشخصيات دي.

بدأت قراءة:

No One Writes to the Colonel by Gabriel Garcia Marquez:
رغم أنها واقعية ومفيهاش عناصر سحرية، لكني مستمتعة بيها.

بيت الرمان لـ أوسكار وايلد:
مجموعة قصصية أفضل ما فيها ترجمة إيناس التركي، لكنها سطحية ومش تفضيلي في الحكايات الخيالية

الفتاة التي أنجبت أمها لـ شادي عبد الحافظ:
كتاب غير روائي وبستمتع بالآفاق الللي بيفتحها لي

Complications in Paris by Melinda Copp:
كتاب خفيف لقيته على نيتغالي وراح مني قبل ما أخلصه فهاستني لحد ما تتاح فرصة تانية عشان أخلصه، لأني بصراحة مهتمة أعرف هيخلص ازاي

الحكاية وما فيها لـ محمد عبد النبي:
كتاب بدأته على أبجد عن الكتابة والتكنيكات بتاعتها، طلعت منه ببعض النصائح اللي ممكن تبقى لطيفة وبعض تمارين الكتابة اللي مكن ترجعني أكتب تاني

مشاهدات الأسبوع:

Yasuke:
أنيمي قصير من 6 حلقات شفته على نتفليكس، وبياخد حاجة حقيقية من التاريخ الياباني وهي ساموراي من السود. كان واحد من العبيد وبعدين اتدرب وبقى واحد من المحاربين الساموراي. لكن هنا طبعا القصة بتاخد منحنى خيالي مع بعض الخيال العلمي. كان عندي بعض المشكلات مع تقدم الأحداث، ومكانش منطقي أني أحس بالملل من أنيمي مدته 6 حلقات بس، المعاركة كانت قوية بس القصة مكانتش قوية بما فيه كفاية ومشتغلوش كويس على تطوير الشخصية. حسيت الأنيمي كله كأنه مقدمة، والمفروض بقى هتبدأ الأحداث الحقيقية.

House:
خلصنا مسلسل “هاوس” أخيرا، ومن الحاجات اللي أدركتها هي أن رغم كل المصايب والبلاوي اللي عملها هاوس مع كل الناس بمن فيهم ويلسون نفسه، لكن فعلا ويلسون خط أحمر عنده وطلع في النهاية هو أهم شخص بالنسبة له ودي علاقة جميلة، تاني رغم المصايب بتاعته. وحاجة كمان خدت بالي منها هي أن أكتر تيم عجبني هو التيم الأول والأساسي، العلاقة بتاعتهم كانت أحلى علاقة أكتر من أي تيم جه وقابلناه بعد كده. شخصية هاوس شخصية بارزة وفارقة، ولسة شايفة إعلان لأنيمي جديد بياخد فكرة هاوس ويطبقها على دكتورة وغالبا هحطه على خطتي عشان أشوفه. وطبعا منقدرش نهرب من المقارنة بين هاوس وويلسون بين شيرلوك وواتسون. متقدروش تقنعونني أنهم مكانوش مقتبسين منهم وبالذات في علاقتهم ببعض.

Parasyte: the Maxim:
أنيمي تاني خلصته واستمتعت بيه. كنت عارفة ملامح القصة الأساسية عشان شفت المسلسل الكوري المستوحى من القصة دي. وهو بيتكلم عن مخلوقات فضائية بتنزل فجأة كوكب الأرض وبتتطفل على أجسام البشر. بتخترق الجسم البشري وتاكل دماغ الإنسان وبتتحكم في الإنسان ده بعد ما تكون قضت عليه وبتبدأ تأكل البشر التانيين باستخدام الجسد البشري، فبتبقى فيه مشكلة في التفرقة بين البشر العاديين والبشر اللي سيطر عليهم الطفيليات. وسط ده كله، البطل الأساسي شينشي، بتحاول أحد الطفيليات السيطرة عليه بس العملية بتفشل وبدل ما تسيطر عليه بالكامل وعلى دماغه وتحل محله دماغه في جسمه، بتتحكم في ايديه اليمين بسو بكده بيبدؤوا يتشاركوا جسد واحد وبتبدأ الأسئلة الوجودية والصراع ما بين البشر والطفيليات. الأنيمي مليان أسئلة زي: احنا ليه شايفين الطفيليات مخلوقات متوحشة لأنها بتاكل البشر كمصدر غذاء ليها؟ مش ده معناه إننا متوحشين برضة في نظر كل الحيوانات اللي بناكلها وبنعتمد عليها كمصدر غذاء لينا؟ أكتر شخصية عجبتني بصراحة هي شخصية الطفيلي “ميغي” اللي بيسيطر على ايد شينشي اليمين.

بدأت مشاهدة:
Great Pretender:
ده الأنيمي الجديد اللي بدأته وستايل الرسم بتاعه مختلف تماما. بلاحظ أن كل الأنميات اللي بتبقى عمل نتفليكس أصلا مش مجرد بتتعرض على نتفليكس، بتبقى تجريبية ومختلفة في أسلوب الرسم عن المعتاد من الأنيمي العادي، حتى من الاستوديوهات المختلفة. هتكلم عنه أكتر لما أخلصه. بس هو أنيمي واقعي كوميدي عن مجموعة من المحتالين اللي بينصبوا على الناس. واتفاجئت لما سمعتهم مستخدمين أغنية فريدي ميركري في النهاية، بما أن اسم الأنيمي أصلا متاخد من أغنية بنفس الاسم ليه.

فيديوهات ولينكات الأسبوع:

فيديو شيق عن اللغات وكيف تموت لغة ما: من هنا
فيديو هادي عن المغزى من الحياة وربما ليست السعادة الدائمة هدفا حقيقيا: من هنا
كتاب بأجواء لطيفة من قناة كتاب وحرفة لـ لبيبة للترتيب والخطط والكتب: من هنا
فلوج لطيفة من قناة جديدة اكتشفتها: من هنا
حبيت أسلوب البنت دي وقناتها بالذات في التحضير لكل شهر في المفكرة بتاعتها: من هنا
فقرة مضحكة قصيرة لفيديو بيتخيل حال العالم من دون مكعب: من هنا
إعلان فيلم ويس أندرسون الجديد: من هنا
.Reading is a means of listening.
Reading is not as passive as hearing or viewing. It’s an act: you do it. You read at your pace, your own speed, not the ceaseless, incoherent, gabbling, shouting rush of the media. You take in what you can and want to take in, not what they shove at you fast and hard and loud in order to overwhelm and control you. Reading a story, you may be told something, but you’re not being sold anything. And though you’re usually alone when you read, you are in communion with another mind. You aren’t being brainwashed or co-opted or used; you’ve joined in an act of the imagination.
_ ursula k. le guin